نكهة العيد

العيد له نكهة طعمها غريبي ما ذقتها الا يوم لقيتها فيك
اقبلت يمي مرحبابك حبيبي كل عام وانت قبال عيني واهنيك
اهديتني باقة ورود .ٍ وطيبي ومحتار يا وردة حياتي وش اهديك
اهديك قلبي منت قلبي وحبيبي قلي وش اللي يا هوى البال يرضيك
نعم احبك يالغصين الرطيبي واحب طاري من يجيني بطاريك
وابيك دايم من عيوني قريبي تروي ضما قلبي من الحب وارويك
من فرحتي بك ادعي انك نصيبي وكل نبضةٍ بالقلب باسمك تناديك
انا اشهد انك يا مدلل طبيبي تعال والمس جرح الاشواق بايديك
عاهدني انك ما تروح وتغيبي يا شمس طلت من عيون الشبابيك
واعاهدك للموت تبقى حبيبي وللموت ماخون المحبه وابكيّك